عبالي أقعد مع حدا كبير بالعمر، يخبّرني عن الحياة، يعطيني فكرة عن كل شي رح عيشه وبالآخر يقلّي ما تخاف، مع الوقت، كل شي رح يصير أحلى. عبالي يقلّي إنّي عم بتعب هلّق لأنّو بعدين رح ارتاح كتير. عبالي يقلّي إنّي رح أوصل لآخر الطريق اللي عم بمشيها ورح إنجح ورح حقق حلمي. عبالي هالكبير يقلّي كم خيبة أمل رح واجه، وكم مرّة رح نام زعلان وكم مرّة رح أوعى من النوم معصّب ومقهور. عبالي يخبّرني إنو كل يوم بقضّيه زعلان رح لاقي بداله إيام كتير كون مبسوط فيها والفرحة مش سايعتني.
عم فتّش على كبير بالعمر، يحكيلي قصص تخلّيني إضحك من قلبي وأنطرها واتمنى تصير معي. عبالي شوف ويخبّرني كيف تغيّرت حياته وصارت أحلى. وإتعلّم منه كيف يقاتل الزمن والضجر واليأس.
لو في كبير بالعمر بيعرف بيقرا الناس، يقراني ويساعدني إتخطّى حالي والحواجز. يعطيني ملاحظاته وينبّهني وين عم إغلط ووين عم إتصرّف صح. عم ركبر بالعمر وبعدني ما فهمت هالدني. رح إكبر أكتر ويمكن لاقي حدا زغير بالعمر يتطلّع فيني وينطر منّي نصيحة أنا بعدني ناطرها.
رح لاقي حدا زغير بالعمر، يسألني عن الحياة، يطلب منّي خبّره عن كل شي رح يعيشه وبالآخر قلّه ما يخاف، مع الوقت، كل شي رح يصير أحلى. رح ينطر منّي إجابات كتير، أنا بعدني ما لقيتها.
وائل يكتب 
كل الكبار ماتو… و كل الصغار ما خلقو
و كل هل حياة أنت و القهوة و الورقة
ما رح يكون في تعريف للحياة لحد ما تموت و ترجع ما تخلق
إعجابإعجاب